1Jo 1 | WSK | STEP | Duap te nunguningkiri Den , marak nunguning ko duap, mu bagaram. Se ana kari borta ko nina ninga manorsan. Ana nangata namatam te aringiman, ale nangarak munakaram se ko kuring ikiman, ale ko kumik ilu aringiman.

1 John 1

Den gira

1 Duap te nunguningkiri Den ^{▼▼1 John 1:1 Greek den te “Logos”, se ko nunguning mu “den” se “ikia”. Jesus kumik te ana Kaem ko munan se ko ikia ko ikisan, mu awuk, nu Kaem tala: John 1:1.}, marak nunguning ko duap, mu bagaram. Se ana kari borta ko nina ninga manorsan. Ana nangata namatam te aringiman, ale nangarak munakaram se ko kuring ikiman, ale ko kumik ilu aringiman. 2 Marak nunguning ko duap nu Nuet ilak Bur ningi baga kari ko kumik guang ago wetang te aratam. Se ana aringiman, ale ko dugu duap balsan, ale iwita ninga manorsan: kari borta marak nunguning tom suen biya te bagara ko mu kariimet nungarso. 3 Buta se kari ana nangata nunguningta aringiman, ale munakaram se kuring ikiman mu ko ninga manorsan. Mu te nina agotala ana nangarak biguwural se Ba Kaem, ko Namar Jesus Kristus ilak, suwanta baganakko. 4 Se ana den imi bataguru ningarsan, mu nina ta, ana ta, te nangamang amilmil ninguru tairukko.

Ana nikim te aolak ilunakko

5 Se den Kaem ko Namar anananga maonam se ikiman ale ana ninga manorsan mu iwita: Kaem mu nikim, tiromorom bo nukote mena. 6 Se ana balnak, “Ana nu ilak bagasan,” manak bare am tiromorom ningi aolak iluwanak, mu ana kawelasan, ale den nunguning me karo tusan. ^{▼▼1 John 1:5 Nikim se tiromorom ko den: John 1:4,9 8:12; 2 Cor 4:6; 1 John 2:9-11.} 7 Bare ana nu nikim te bagoso iwitatala nikim te aolak ilunak, mu ana nainimi karogo bagara suwanta, se noko Namar Jesus ko gue mu anananga memek suen biya siwuso.

8 E ana balnak, “Ana nangimik ikup bo mena,” manak, mu ana nangata nainimi kulursan, se den nunguning mu nangate mena. 9 Bare nanga memek wetang te Kaem manornak, mu nu ana me nanga bitirukko, mu nu munan diram bitiruk ale anananga memek suen la siwu sapuruk se ana udagi memek bo mena, ningo la baganakko. ^{▼▼1 John 1:9 Kaem nanga memek siwurokko: Psalm 32:5; Proverbs 28:13.} Bare ana iwita balnak, “Ana memek bo me beteman,” ma balnak, mu ana Kaem kawel kari ko balsan, se noko den nangamang ningi me aniso.

10